英國床蝨恐慌｜蟲害特性及治理方式

床蝨（bedbugs）向來「易請難送」。無論環境幾咁企理，蟲蟲仍然可以無聲無息滲入家居，三更半晚出嚟咬到全屋無覺好瞓。

 

今年英國床蝨侵擾（bedbugs infestation）尤為嚴重。蟲治龍頭企業能多潔（Rentokil）透露，今年六月至九月間，床蝨治理查詢已超越2022年全年數字。小弟其中一個客戶亦為蟲治公司，過去兩個月床蝨治理生意額較去年大增超過100％，當中唔少客戶都係在英香港家庭。倫敦、斯勞（Slough）、雷丁（Reading）、史雲頓（Swindon）、布里斯托（Bristol）等南部城鎮，因人口流動率較高，自然淪為重災區。

 

床蝨如何進入家居？

床蝨侵擾不如其他蟲害般具季節性，全年都可以發生。但凡在人流密集地區，坐過公共交通工具、住過酒店、去過戲院，都有可能帶成蟲或者蟲卵返屋企。

 

成蟲進入家居後，傾向尋找陰暗位置躲避和繁殖。蟲卵亦有可能在衣物、旅行篋、公事包等表面靜待三至六個月，直到時機適合先孵化。

 

床蝨習性

床蝨討厭日光，並會隨室內二氧化碳含量提高而更活躍，因此傾向喺睡房出沒，並會趁晚間人類入睡時爬出嚟搵食。相對而言，若然晚間唔會有人喺度過夜，各位不必擔心客廳或空置房間會有長期床蝨問題。

 

判斷床蝨入侵

床鋪周圍黑點：晚間人類翻身時，可能壓死成蟲而留下深紅色污點。另外可留意家具接縫或角落有無黑色黏液，如有，咁有可能床蝨糞便。

 

獨特咬痕：其他昆蟲咬痕一般都係雜亂無規律；床蝨咬痕則會以三至四點形式一條線。咬後一至兩日，首先會覺得非常痕癢，隨後轉為疼痛，尤其沖熱水涼時痛感更強。

 

一般家居治理

第一步：用熱水清洗所有床單、被鋪、房內衣物。如有位何物料不能扔落洗衣機，可以考慮用高溫蒸氣機徹底「蒸」一次。

 

第二步：用吸塵機徹底清潔房間，包括所有家具同裝飾內外表面、床架接縫同角落、床褥、地腳線、地板、窗框等等。處理完後直接扔塵袋出街外垃圾桶。

 

根據個人經驗，如果可以堅持連續兩星期日日去做頭兩步，並且其後兩至三個月再無蟲咬，暫時可以放心一陣。若然房間雜物太多、實在無時間日日去大陣仗清潔，咁樣就可能要考慮專業治蟲服務。

 

 

專業治蟲服務

要搵合資格公司，各位可以登上英國蟲治協會（The British Pest Control Association、BPCA）網頁，填上郵政碼，網站就會顯示合資格公司名單。根據BPCA指引，各服務提供者可以為客戶提供兩類服務；一係殺蟲劑噴灑（spray）或霧化（misting / fogging）；另一種係熱處理（heat treatment）。

 

無論係用邊種殺蟲劑，合資格公司採用之化學品理應對人體無害，並且喺自然風乾後，持續有兩至三星期殺蟲效果（residual effects）。視乎服務地區（service area）、承諾期間（guarantee period）等，間間公司收費唔同，每劑收費大約£100至£180鎊左右。部分公司會提供「絕對保證」服務，收費會貴少少，但通常包含最少兩劑噴灑，承諾喺兩個月內徹底消滅現存床蝨問題。

 

至於熱處理，收費一般昂貴得多，有時可以去到差唔多成千鎊，但係效果相當顯著。如果有人長期每晚遭受十幾廿次蟲咬，又或者已經試過一般殺蟲劑處理而無效，咁可能要認真考慮吓。

 

資料提供：Alec Minter、Scott Hyslop（PESTUK總監及總經理）
撰文：言又勤（多行業營銷員）